Advertise Here
Aeroplane Documentaries History Interesting Mysterious Special

Bermuda Triangle Urdu History Bermuda Triangle Documentary Hindi Haqeeqat

Bermuda triangle udu history isay maut ki wadi kahain ya aik pur israr shetani ilaqa keh yahan se guzarnay wale behri jahaz, kashtiyan, hawai jahaz aur pichlay 500 saal ke doran najanay kitnay insan ghaib ho chukay hain. Magar 500 bars guzarnay ke baad is jadeed door mein aaj bhi is khaufnak jagah ki pur israriyat qaim hai aur najanay aglay kitnay saalon tak ye raaz hi rahe ga keh akhir yahan se guzarnay wali har cheez kahan ghaib ho jati hai. Is documentary mein aap jaan sakain ge is pur israr maqam se juray 500 saal purane khaufnak waqiat, bermuda triangle ki tareekh, bermuda tikon akhir hai kahan, Yahan ghaib ho janay wale aik hawai jahaz ke pilot ki guftugu, is ilaqe mein aaj tak andazan kitnay log ghaib hue, kitne behri jahaz aur tayyare is pur israr bermuda triangle ki nazar ho chukay hain, 1872 mein bermuda triangle mein doobay hue behri jahaz ka achanak apni asal halat mein namudar hone ka waqia aur is ilaqe se juri kayi aur dusri herat angez maloomat bhi isi documentary mein shamil hain.

Bermuda Triangle jisay sheetani ya aseebi tikon ke naam se bhi jana jata hai aik aisa pur israr samandari ilaqa hai jahan ab tak 100 se zayada behri jahaz aur hawai jahaz la pata ho chukay hain. Is jagah physics ka koi qanoon kaam nahin karta. Bermuda Tikon ke bare mein janne se pehle bermuda jazair ke bare mein janna bohat zaroori hai.

Bermuda Triangle Kahan Hai

Bermuda jazair shumali behr e oqyanoos mein shumali caroolina ke janoob mashriq mein 650 meel ke faslay par 300 jazeeron ka majmua hai. In mein sirf 20 jazeeray abad hain jin mein sirf 6 aham hain. Bara jazeera great bermuda 14 meel lamba hai. Jabkeh deegar jazair mein Somerset, Ireland, Saint George, Saint David aur Boaz aham jazeeray hain ye tamam jazeeray moonge aur marjaan se banay hain. Bermuda ka kul raqba 53 km yani 20 muraba meel hai. Abadi 63000 nafoos aur darul hakumat Hamilton hai.

Bermuda Triangle History In Urdu

Bermuda ko daryaft karne ka sehra spain ke aik jahaz raan Juan De Bermudez ke sar hai jo 1503 mein yahan aya tha. Usi ke naam par ye bermuda kehlaya is ke baad yahan koi abadi qaim na hoi. 1609 mein Sir George ki qayadat mein angrez abad karon ki aik team yahan ayi. Jald hi ye bartania ki crown colony ban gaya. Dusri jang e azeem ke doran yahan amreeca aur bartania ke aham behri adey qaim thay.

Bermuda Triangle ke janoob mashriqi sahil ke paas aik aisa samandari ilaqa hai jahan ab tak kayi behri jahaz aur hawai jahaz gum ho chukay hain aur jahan dunya ke herat angez waqiat ronuma hote hain. Is tikon ne 11 lack 40,000 muraba km yani 4 lack 4000 muraba meel ka ilaqa gheer rakha hai. Is ke aik taraf bermuda jazeera hai dusri taraf amreeca ka shehar Miami aur tesri taraf Puerto Rico waqe hai.

Bermuda Triangle Urdu Information

Darasal Bermuda Triangle ka naam koi naya nahin hai par is par bars ha bars se behs aur tehqeeq ho rahi hai keh 2017 mein aaj bhi science daan yahan paish anay wale waqiat ke bare mein koi thos shahadat faraham karne mein nakam rahe hain yehi wajah hai keh Bermuda Triangle aaj bhi dunya mein sub se zayada pur israr ilaqa hai. Aam khayal ye hai keh physics ka koi qanoon yahan kaam nahin karta aur yahan har taraf ajeeb o ghareeb roshniyon ka hajoom rehta hai aur is se barh kar ye keh yahan se kisi chez ka bach kar nikalna bara mushkil hai. Hawa mein parwaz karne wale bare bare hawai jahaz hon ya samandaron ke badshah behri jahaz ye aise ghaib hote hain keh in ka naam o nishan tak nahin milta.

Purisrar Shetani Ilaqa
Aam logon ka khayal ye hai keh yahan shetani quwaton ki hukumat hai. In afwahon aur waqiat par kayi filmain ban chuki hain aur kayi kitabain bhi likhi ja chuki hain. Main khud pichlay 12 salon mein is par beshumar articles likh chuka hon. Lord Of The Rings nami aik film hai shayed aap ne dekhi ho us film ka markazi khayal bhi is se taluq rakhta hai. Ab tak hazaron pilaton, malahon aur dusre behri o hawai safar karne wale musafiron ne yahan par bohat si herat angez aur mafooq alfitrat baton ka mushahida kiya hai. Un pur israr waqiat mein bhi ye baat mushtarkah hai keh musafir jub bhi is triangle ke qareeb pohanche un ki ghariyon mein tatul paida hua aur machinon ne apni harkat band kar di jabkeh machinery aur us ka control pilaton aur malahon ke ikhtyar mein nahin raha.

Is ilaqe ko dunya bermuda ke naam se hi janti chali arahi thi magar Is khitay ko bermuda triangle ka naam 1964 mein diya gaya tha jo ab tak chala araha hai lekin aam logon ko asal dil chaspi us waqt paida hoi jub charles belfoure ne bermuda triangle nami kitab likhi jis se logon ko is ilaqe se juri baton ka maloom hona shuru hua. Dilchasp baat ye hai keh mashoor saiyah christopher columbus ne jub 1492 mein is ilaqe ka safar kiya tou us ne likha keh is samandari khitay mein aisi pur israr quwat mojood hai jo keh har chez ko apni taraf khench laiti hai.

Bermuda Triangle Ke Waqiat
Christopher Columbus ne apne safar ke doran jin ajeeb o ghareeb waqiat ko dekha tha us ne un ke bare mein kuch yun likha tha: Main ne florida se guzartay hue dekha keh bermuda ke maqam par aag ke golay thay. Mere qutub numa ne kaam karna band kar diya tha. Aur main ne yahan kuch uran tashtariyon ki mojoodgi payi. Ye thay woh inkashafat jo columbus ne pehli martaba bermuda ke mutaliq kiye thay.

Ab tak is ilaqe se bohat se aise mafooq alfitrat waqiat wabasta ho chuke hain aaeye un mein se kuch waqiat ke bare mein bhi jaan laite hain.

Ye 18th century ke akhir ki baat hai keh jub yahan 4 se zayada kashtiyan doob gayien thie jo keh tamam ki tamam amreeca ki malkiyat thien. Kuch arsa baad yahan aik behri jahaz bhi doob gaya woh taqreeban 340 afrad samait is tarah doob gaya tha keh aaj tak us ka koi suragh na mil saka. Is ke kuch arsa baad aik abdooz 90 afrad samait ghaib ho gayi thi. Yahan sub se numayan waqia 5 december 1945 ko hua jis mein amreeci behria ke 5 bambaar tayaron ne 2:10 minute par parwaz bhari 3 bajay aik tayare ka paigham aya keh aik ajeeb surat haal ka samna hai main apni jagah ka taeen nahin kar pa raha hon aur phir achanak 3 bajay un panchon amreeci bambaar tayaron se rabta munqata ho gaya aur woh tayare yahan pohanch kar hamesha hamesha ke liye najanay samandar ki is khaufnak aur pur israr dunya mein kahan ghaib ho gaye. Is waqia mein 14 afrad halak hue thay jahaz jub rawana hue tou mausam bohat saaz gar tha lekin phir achanak khatarnak ho gaya aur hawa bazon ke liye manzil talash karna mushkil ho gaya tha.

Bermuda mein herat angez tor par ghaib ho janay wale amreeca ke in 5 tayaron mein se aik tayare ke pilot ki guftugu ke bare mein amreeca mein aik khabar chabi tou jis mein bataya gaya tha keh jahaz ghaib honay se pehle pilot ne is bare mein kuch maloomat faraham ki thien pilot ne kya kaha tha aeye jante hain.

“Ham safaiyd paanii mey dakhil ho rahay hyn hamein nhi pata ham kahan hein, paanii sabz nhi safaiyd hai.”

Is waqia ke baad in jahazon ko talash karne ke liye 1 jahaz aur bheja gaya tha magar woh bhi purisrar tor par ghaib ho gaya aur aaj tak us ka kuch maloom nahin keh woh jahaz kahan ghaib hua aur us ke ghaib honay ki wajah kya thi.

Sadiyon Purani Bermuda Triangle Ki Tareekh

Mahireen ne is khitay mein ajeeb o ghareeb aur pur israr waqiat ki jo tareekh muratab ki hai us ka aghaz tou sadiyon purana hai magar yahan herat angez tor par ghaib honay walay jahazon ki paheli sadiyon baad bhi suljhai nahin ja saki. 1997 tak yahan 16 baray pur israr waqiat ho chuke hain aur majmoi toor par ab tak 100 se zayada behri jahaz aur tayare bermuda triangle ki nazar ho chuke hain jis mein aik andazay ke mutaboq ab tak aik hazar log halak ho chukay hain.

Bermuda Triangle Ki Haqeeqat Kya Hai

Bermuda triangle ka raaz kya hai is bare mein science danon ne kafi tehqeeq ki. Sciencedanon ka ye kehna hai keh is ilaqe mein pur israr qisam ki shuain payi jati hain jo lamhon mein bare bare behri jahazon ko gharq kar sakti hain. Khalai sayaron se maloom hua keh yahan bare bare samandari taufaan anan fanan janam laite hain aur dekhte hi dekhte khatam ho jate hain. Is ilaqe mein zalzalon ki sharah bhi bohat zayada hai. Aik theory ye bhi hai keh yahan hydrates gas ghair mamooli miqdar mein payi jati hai jo pani ki kamiat ko tabdeel kar deti hai. In se jahaz chand hi lamhon mein apna nishan choray baghair gharqab ho jate hain.

Amreeci geological survey ki teamon ne yahan methane gas ki bhi nishan dehi ki hai aik dilchasp baat ye hai keh ye ilaqah 80 degree par waqe hai jahan qutub numa sahi tor par kaam nahin karta. Is ko parhne mein kam az kam 20 degree ka farq paida ho jata hai jis se behri aur hawai jahazon ke captaan bhatak jate hain. Yahan electromagnatic lehron ki miqdar bhi zayada hai jis se behri aur hawai jahazon ka mawaslati nazam darham barham ho jata hai.

Magar ghoor karne wali baat ye hai keh samandaron ka raqba tou bohat hi wasi hai tou phir electromagnatic lehron ki itni bari miqdar sirf bermuda triangle par hi kyun hai samandaron mein aisa kisi aur jagah kyun nahin hota aur bermuda triangle mein aaj tak jitni bari tadad mein jo pur israr waqiat paish aye hain ye itni bari tadad mein samandaron mein kisi aur maqam par kyun na paish aye yehi woh chez hai jo is ilaqe ko aur bhi khaufnak aur pur israr bana deti hai.

Bermuda Triangle ki pur israriat mumkin hai hazaron lakhon saal se jari ho taham akhri 500 saal ke guzre hue waqiat bohat paicheeda aur aham hain. Ye waqiat chand aik nahin seenkron nahin balkeh hazaron mein hain aur kuch tou aise waqiat bhi bermuda triangle se wabasta ho sakte hain jin ka hamain maloom bhi nahin hai. Ab jo waqia mein aap ko is khaufnak samandari ilaqe ke bare mein sunanay ja raha hon isay sunn kar aap ko andaza ho jaye ga keh ye ilaqa dunya ke sub se zayada pur israr tareen ilaqa hai.

Purisrar Waqia Dooba Hua Jahaz Namoodar Hua

Woh 5 december 1872 ki aik sham thi jub Mary Celeste nami aik behri jahaz jo arsa daraz se achanak bermuda triangle mein kahin ghaib ho gaya tha baghair kisi fani nuqsan ke bilkul sahi halat mein beh e oqyanoos ke maqam par namoodar ho gaya. Herat angez baat ye thi keh us jahaz mein har chez apni jagah qareene se thi. Us ka engine bhi theek halat mein tha petrol kafi miqdar mein mojood tha. Nalkay, taar, rasiyan sub darust halat mein thay aur pani ka tank jo’on ka to’on bhara hua tha jo musafiron ke liye 6 mah ke liye kafi tha. Jahaz par kisi qisam ke hamlay ka koi nishan mojood na tha. Aisa lagta tha jese taweel mudat tak yarghamal rakhne ke baad is jahaz ko ab chhor diya gaya ho. Ye sub kuch tha magar khaufnak baat tou ye hai ke jahan mein jo sainkron musafir mojood thay woh sub ghaib thay akhir jahaz mein har chez mojood honay ke bawajood sare ke sare musafir kahan ghaib ho gaye in baton ne logon ko ye sochne par majboor kar diya keh shayed yahan koi shetani taqat hai, kuch log tou yahan tak sochnay lage keh shayed ye kisi dusri dunya ka rasta hai ya yahan kisi dusri dunya ka thikana hai. Musafir tou behri jahaz se najanay kahan ghaib ho chukay thay par kaptaan ka cabin khula hua tha. Us mein itla’at ka register bhi mojood tha jis mein us waqt tak ki tamam maloomat darj thien jub jahaz bermuda triangle ke paas pohancha tha.

Kaptaan ke kamre mein currency note, sikay, qeemti jawahraat aur aham kaghzaat sub mojood thay. Musafiron ke liye mez par khana bhi tha aur galason mein pani bhi bhara hua tha. Khanay ke sub bartan mukhtalif ashya se bhare hue thay. Store mein ghizai zakheera mojood tha jo 6 mah ki zarooriyat ke liye kafi tha. Gharz ye keh har chez apni jagah qareene se mojood thi taham musafiron ka naam o nishan tak nahin tha. Is jahaz ke sath paish anay wale waqie ki tehqeeqat ke liye bartanwi police ne bare jatan kiye. Bartania ke suragh rasan barson is khooj mein masroof rahe aur koi suragh na mil saka aur aaj tak ye raaz koi na jaan saka ke akhir jahaz ke sare musafir kahan ghaib ho gaye.

Zameen par ye woh wahid jagah hai jahan insan aur science donon hi bebas nazar atay hain. Yehi wajah hai ke is bare mein sciencedaan kabhi koi dawa karte hain aur kabhi koi nazriya paish karte hain magar bermuda triangle ki pur israriat un ke tamam daway aur nazriyat ki dhajiyan ura deti hai.

Bahar haal… afwahain, kahaniyan, haqeeqat aur andazay jitnay bhi hon haqeeqat ye hai keh aaj ki 21 th century ki herat angez scienci taraqi ke bawajood bermuda triangle sciencdanon ke liye aik challenge hai. Bermuda triangle ne sainkron behri o hawai jahaz tou nigal liye par un ka malba kahan jata hai ye bhi kisi ko maloom nahin aur ye silsila aglay kitnay salon, kitni sadiyon tak younhi jari rahe ga is bare mein bhi khuch nahin kaha ja sakta.

zvr
Your Reaction

2 Comments

Leave a Comment