Advertise Here
Facts Games Videos World

Blue Whale Game Urdu History Facts Kahani Blue Whale Game Hindi Story

Blue whale game akhir hai kya is ki tareekh kya hai is kheel ki maloomat kya hain is game ko kis ne banaya tha, is game se halak honay walon ke waqiat aur woh kon se mulk hain jahan is game ko khelnay wale apni zindagiyon ka khatma kar chukay hain. Ye game kese kheeli jati hai isay kheelnay ki invitation kahan se ati hai aur woh kon sa facebook profile name hai jahan se is game ko kheelnay ki invitation bheji gayi thi aur is game se bachon ko kyun door rakhna intihai zaroori hai ye article isi bare mein hai keh aap apne bachon ko is khooni kheel se door rakhain kyun keh ye kheel sirf 50 din mein is game ko kheelnay walay ka khatma kar deta hai. Ye sub batain isi blue whale game ke bare mein isi mazmoon mein shamil hain tou aeye jantay hain blue whale game ke bare mein woh sub batain jo aap ke liye janna zaroori hain.

Blue Whale Game Documentary In Urdu

Is game ke bare mein aik dastawezi film bhi banai gayi hai aap chahain tou ye article parh lain ya aap ki asani ke liye is par aik short film bana di gayi hai aap woh bhi dekh sakte hain isi post mein mojood hai ye video.

Blue Whale Game History In Urdu Blue Whale Game Information In Hindi
Blue whale game ab tak taqreeban 150 se zayada afrad ki jaan lay chuki hai. Blue whale game ka aghaz russia mein 2013 mein hua tha aur is game ko Philipp Budeikin ne takhleeq kiya hai. Is game ka tasawur sahil par anay wali whale se liya gaya hai. Sahil par phansnay wali kuch whale khud kushi karne ke liye sahil ka rukh karti hain. Is game mein bhi akhir mein player ko khud kushi karne ka kaha jata hai. May 2017 mein is game ko takhleeq karne wale philipp ko Rus mein harasat mein lay liya gaya tha philipp ko 16 naujawan larkiyon ko khud kushi par uksanay ka mujrim mana gaya hai.

Par sochnay ke baat tou ye hai keh us ne is game ko kya soch kar banaya ho ga aur us ka maqsad kya sirf yehi tha ya woh kuch aur karna chahta tha is bare mein Philipp ne bataya keh is game ko banane ka maqsad khud kushi ke zariye mushray ke faltu logon ka safaya hai.

Urdu Facts Blue Whale Game Kaise Kheete Hain

Ab ye jaan letay hain keh is game ka tareeqa kar kya hai aur is game ke zariye kis tarah insan khud kushi karne par majboor ho jata hai. Bunyadi tor par is game ke 50 marahil hain is game mein player ko 50 din mein 50 task puray karne hotay hain aur akhri task khud kushi ka hai. Jese hi koi shakhs game ko follow karta hai tou game shuru ho jati hai. Blue whale nami ye game kheelnay wale ko pehle tou apne sehar mein jakar leti hai aur baad mein ahista ahista game kheelnay wale se us ki zaati maloomat hasil ki jati hain. Blue whale game mein user ko ba asani game ka administrator dekh sakta hai aur is tarah game ke shuru ke task aam se hotay hain jese adhi raat ko daraoni film dekhna ya adhi raat ko uthna aur aise hi user ko challenges milte rehte hain aur us ko pata bhi nahin chalta keh kab woh nashay aur dusri buraiyon mein mubtala ho jata hai. Player ko in task ke puray karne ka dastawezi aur tasweeri saboot bhi faraham karna hota hai.

Is mein player ko khud ko nuqsan pohanchana hota hai, Manshiyat ki zayada miqdar leni hoti hai ya kisi unchi building par charh kar bilkul kinare par khara hona hota hai. In tamam marahil mein player apni zati shanakht aur zati maloomat bhi game ke admins ko faraham karta rehta hai. Un maloomat ko baad mein player ko blackmale karne ke liye bhi istemal kiya jata hai. Game ka har task mukamal karne par player ko kaha jata hai keh apne bazu par chaqu se nishan banaye. Jese jese task mukammal hote hain bazu par blue whale ki shakal banti jati hai aur game ke pachaswein din 50th task mein player ko khud kushi karne ka kaha jata hai jis se inkar par us ki zati maloomat shaya karne ki dhamki di jati hai isi wajah se game shuru karne wale ke liye aik baar game shuru kar ke wapis ana mushkil hota hai. Ye game mobile par kisi website ya play store ke zariye download nahin ki jati balkeh is ka link diya jata hai aur woh link darasal maut ka link hota hai ye link kahan aur kaise diya jata hai agey chal kar is bare mein baat karte hain.

Blue Whale Game Ke Waqiat Aur Khaufnak Kahani
Aaeye ab un logon ke bare mein baat kar laitay hain jinhon ne blue whale game kheeli ya jo ye game kheel kar apni zindagi ka khatma kar chukay hain.

Argentine
Dunya bhar mein 150 se zaid afrad is game ko kheelnay ki wajah se khud kushi kar chukay hain un mein Argentine ke subay San Juan mein aik 14 sala larka bhi shamil hai is ke ilawa argentine ke aik aur ilaqe La Palata mein bhi aik 12 sala larki ke dada ne aik police station se shikayat ki aur tashweesh zahir ki keh us ne apne bazu ko blue whale game ki wajah se kisi tez dhar churi waghera se zakhmi kar liya hai. Is ke ilawa argentine ke hi aik aur rehaishi ilaqe Entre Ríos ke aik 16 sala larka ko 27 june 2017 ko San Martin De Parana hospital mein dakhil karwaya gaya tha jo isi qatil game blue whale ki wajah se dunya se rukhsat ho gaya us larkay ne 31 may 2017 ko khud kushi ka challenge mukammal karne ki koshish ki thi.

India
Ye wehshatnak waqiat sirf argentine mein hi nahin hue balkeh in mein India bhi shamil hai. Mumbai se taluq rakhne wale aik larkay ne panchwien manzil se chalang laga kar khud kushi kar li us ke bare mein shubah hai keh ye karwai isi blue whale game ki wajah se ki gayi hai.
26 july 2017 ko Kerala mein aik 16 sala indain larkay ne is game ki wajah se khud kushi ki thi us larkay ki maa ne media ko ye bataya tha keh woh blue wale game kheel raha tha aur woh raton ko qabristanon aur sunsan sahilon par janay laga tha us ne apne hath par cut laga kar whale ka nishan bhi banaya tha aur bilakhir woh isi game ki wajah se is dunya se chala gaya.
Aaj se yehi koi 12 din pehle 30 august 2017 ko aik 19 sala larkay ne isi game ki wajah se khud ko phansi de di thi. Police ke mutaliq us larkay ke bazu par na sirf whale ka nishan tha balkeh blue whale bhi likha hua tha. Us larkay ke mobile se police ne us whatsapp group ka pata lagaya jahan group ke 75 members ye game kheel rahe thay.
Aaj se sirf 9 din pehle yani 3 september 2017 ko Madhya Pradesh mein aik larkay ne chalti train ke samne chalang laga kar apni zindagi ka khatma kar diya aur wajah yehi blue whale game thi kyun keh us larkay ke school ke dost ne bataya keh woh na sirf blue whale game kheela karta tha balkeh mujhe khud bhi is game ko kheelnay ka mashwara deta tha.

Saudi Arabia
Is qatil game ne India hi nahin balkeh Saudi Arab ka bhi rukh kiya aur 5 june 2017 ko aik 13 sala larkay ne apne kamray mein khud kushi kar li thi us larkay ne khud kushi ke liye play station ki taron ka istemal kiya tha us ki maut ko blue whale game se munsalik kiya gaya hai woh Saudi Arab mein is manhoos game blue whale ka pehla shikar tasawur kiya jata hai.

Chile
Chile intihai khubsurat qudrati nazaron se mala maal mulk hai yahan beshumar khubsurat sahil hain magar afsoosnak baat tou ye hai keh is mulk ko bhi blue whale game ne nahin bakhsha.
Chile mein aik 12 sala larki ki maa ne chile ki police ko itla di keh us ki 12 sala beti ne apne bazu par 15 cut laga kar khud ko shadeed zakhmi kar liya hai us ne apne bazu par cut laga kar whale ka design banaya. Police ne us bachi se tafteesh shuru ki tou us ne ye iqrar kiya keh woh pichlay kuch dinon se blue whale nami aik game kheel rahi hai aur wohi kar rahi hai jo usay blue whale game kheelnay ke doran is game ke admins karnay ko kehtay hain.
Aisa hi aik aur waqia chile ke aik aur shehar mein isi game ki wajah se paish aya tha jub 13 sala larki ne apni 3 saheeliyon ke sath blue whale game kheelna shuru ki thi. Woh larki is wehshatnak game ki daswien stage ya daswien task tak pohanchi thi aur us ne apna bazu kaat liya tha.
Chile ke shehar Temuco mein aik 11 sala larkay ko facebook par blue whale game ko join karnay ki invitation bheeji gayi thi jisay us larkay ne foran qabool kar liya magar phir is game mein shirkat karne se us ne inkar kar diya usay jis facebook profile se game mein shirkat karne ke liye rabta kiya gaya tha us profile ka naam Ballena Azul tha.

China
China jo keh dunya ka sub se zayada abadi wala mulk hai ye kaise ho sakta hai keh jis mulk mein dunya ke sub se zayada log rehte hon wahan blue whale game ka koi nishan na ho. Cheen mein 2 larkiyon ki khud kushi ki tasaweer internet par viral ho chuki hain jin ke bare mein kaha jata hai keh un donon ne blue whale game kheeli thi.

Colombia
Colombia mein blue whale game 2 logon ki jaan lay chuki hai colombia ki national police ki abhi tak is bare mein tehqeeqat jari hain.

Georgia
Georgia mein 27 may 2017 ko aik 12 sala larki ne 5 manzila imarat se chalang laga kar khud kushi ki koshish ki woh blue whale game ke akhri task yani pachaswien task tak pohanchi thi magar usay bacha liya gaya tha woh kuch din hospital mein zair e ilaj rahi aur is case ke bare mein bhi georgia ki police ne apni tehqeeqat jari rakhi hoi hain.

Spain
Spain mein aik larkay ko Barcelona ke hospital mein dakhil karwaya gaya tha jis ki family ka kehna tha keh woh kuch dinon se blue whale game kheel raha tha.

America
Amreeca mein bhi blue whale ne kafi shikar kiye un mein se aik waqia 8 july 2017 ka hai jub amreeci riyasat Texas ka aik 15 sala larka is wehshatnak game ki wajah se dunya se chal diya.

Russia
Is game ko takhleeq karne wale ka taluq russia se hai shayed yehi wajah hai keh blue wale ne sub se pehle russia ke bachon ko apna nishana banaya aur aik andazay ke mutabiq ab tak russia mein 130 ke qareeb log apni janon se hath dho baithay hain.

Serbia
Serbia mein aik rehaishi ilaqa jis ka naam Velika Plana hai is ilaqe se taluq rakhne wale 13 sala larkay ne apna hath zakhmi kar liya tha us ne apne waldain ko bataya keh us ne ye blue whale nami game ki wajah se kiya hai us larkay ke waldain ne is sare mamlay ki itma serbia ki police ko bhi di.

Isi tarah dunya bhar ke aur bhi bohat se aise mumalik hain jahan aise waqiat paish aa chukay hain jin ka seedha seedha taluq blue whale game se hai. Is game ne puri dunya mein tabahi macha rakhi hai is game ke link dene wale internet par hi mojood hain khas tor par social media par is liye pakistan mein bhi is game tak bachon ki rasai ho sakti hai. Zaroorat is amar ki hai keh apne bachon ki activities par khas nazar rakhain aur ye baat bhi zehan mein rahe keh is game ka link privately share kiya jata hai ya aisa link social media ki koi website, twitter, facebook, gmail, whatsapp waghera par bhi aa sakta hai. Aur woh bachay jo pehle hi blue whale game kheel rahe hain is game ke operators unhain majboor kartay hain aur dhamkiyan detay hain keh woh aur logon ko is game mein shamil karain aur is ka link dain. Aap ki zara si kotahi aap ke liye zindagi bhar ki musibat ban sakti hai is liye bachon ko is tarah ki gamon se door rakhne ki koshish karain kyun keh is article mein bataye gaye tamam afsoosnak waqiat se aap ko andaza ho chuka ho ga keh blue wale game ka shikar choti umar ke bachay hotay hain.

zvr
Your Reaction

Leave a Comment