Advertise Here
Countries Documentaries History Information World

Greece History In Urdu Greece Hindi Unan Urdu Information

Unan History In Urdu – Unan jughrafiyai tor par aise maqam par waqe hai jahan europe, africa aur asia ke rastay baham mil rahe hain isi liye ye sar zameen mazi ki tareekh mein bohat aham kirdar ada karti rahi hai. Baaz Nateeni hukmaranon aur Usmani Turk badshahon ne Unan ke is mahal e waqu ko apni hukumaton ke wust ke liye khoob istemal kiya aur is mulk ke zariye teenon bar e azmon ke ilaqon par apna iqtidar taweel se taweel tar kiya. Shayed isi wajah se aaj ka Unan guzray hue 3000 saalon ki saqafat ka ameen hai aur is ki zuban mein sadiyon ki tehqeeq aur insani khushbu rachi basi hai.

Unan kyun keh aik qadeem mulk hai is liye sadiyon se yahan par hijrat ka amal kasrat se jari raha hai. Turkon ke bohat se qabail yahan mustaqil abad hote rahe. Africi ghulamon ke khandan yahan sadiyon se abad hain in ke ilawa musalsal sayasi inqilabaat ke baes kayi asiyai naslon ke log bhi ab is sar zameen ko apna watan keh kar khush hote hain aur europe se anay walon ko tou ye watan apna keh kar hamesha galay lagata hi raha hai.
29 may 1453 ko Usmani Turkon ne yahan qabza kiya us waqt baaz nateeni akhri badshah yahan hukumat karta tha jo maidan e jang mein shikast khata hua Unani hadood se nahil gaya aur is tarah ye mulk Musalman sultanon ke qabzay mein aa gaya. Kam o baish 400 saal ke shandar taweel door e hukmarani ke baad 1829 mein yahan se Musalmanon ke door ka khatma hua. Aaj bhi Unan ke kuch ilaqe Usmani Turkon ki yaadgaron se bhare hain.

Unan country ka mojooda dastoor 1975 mein manzoor kiya gaya is se pehle 1967 se 1974 tak yahan fauji amreeyat musalat rahi. 1986 mein is dastoor mein mazeed tarameem ki gayien aur sadar ke ikhtyarat ka mazeed taeen kiya gaya. Ab Unan ke sadar ke paas wasi ikhtiyarat hain aur sadar parliament se 5 saal ki mudat ke liye 2 baar muntakhib ho sakta hai. Wazir e azam ki mudat intikhab 4 saal hoti hai aur yahan ki saiasi partiyan zayada tar shakhsiyaton ke zair e asar hoti hain. Mumlikat ko 13 intizami hison mein taqseem kiya hua hai lekin hukumat ka intizam zayada tar markaziyat ka hi mohtaj hai. 1974 tak fauj bhi mulki siasi muamlaat mein mudakhlat karti rahi hai magar ab aisa nahin hai ya bohat kam hai.

Unan mein GDP ka 6% difa par kharch kiya jata hai aur ye is ilaqe ke jumla mumalik mein difa par sub se zayada kharch ki jane wali sharah hai. Mulk Unan ka nizam e taleem qadeem bunyadon par istawar hai aur kafi mushkil bhi hai shayed isi liye students ko school ke liye bhi taleemi tafheem ke liye teachers ke paas jana parta hai.

Saqafati Tor par Greece aik shandar wirsay ka hamil hai. Baaz Nateeni door ki mutadad yadgarain jin mein badshahon ke maqbare bhi shamil hain yahan ka azeem wirsa hain. Log door daraz se yahan mazi ki imarat dekhnay ke liye atay hain jis ke baes sayahat (tourism) ab Unan mein aik sanat ki shakat ikhtyar kar chuki hai. Unan ki abadi (population) 1 crore se kuch zayada hai aur yahan Musalmanon ki aik bohat bari tadad abad thi lekin 1923 ke Greece Turkey Agreement ke baad jis mein abadi ke tabadlay ka muahda bhi shamil tha Unan mein Musalmanon ki tadad kam honay lagi. Is muashday ke teht Musalman Turkey chale gaye aur esai Unan mein muntaqil hue. Ab Musalmanon ki 400 saal hukumat wale is mulk mein Musalmanon ki sharah mehz 15% reh gayi hai. Is ke bawajood bhi baaz shehron aur jazair mein 40% tak bhi Musalman abad hain aur Turkey zuban bolte hain aur maqami rasm o riwaj par un ke gehre asrat hain. 1990 ke baad se Unan mein Musalmanon ki amad ka silsila kasrat se jari hai ye Musalman Mashriq wusta, Pakistan, India aur Bangladesh se yahan muntaqil hue hain aur bari community ban gaye hain. 2006 mein Musalmanon ko Masajid bananay ki ijazat bhi mil gayi hai aur ab Athens ke maghrib mein aik bari jagah par mushtamil Musalmanon ka deeni markaz mojood hai jahan Musalman apni deeni taleem aur faraiz ki baja awri ke liye jama hote hain. Turkey aur Unani zubanon mein Unan ke Musalman bache apni mazhabi taleem hasil karte hain jabkeh Quran e Majeed unhain Arabic zuban mein hi sikhaya jata hai.

zvr
Your Reaction

Leave a Comment