Advertise Here
Food

Khajoor Ko 100 Saal Tak Mehfooz Rakhne Ka Tarika

Aap ko khajoor ki afadiyat ke mutaliq maloomat tou hon gi par is lazeez phal ko 100 saal tak taza aur mehfooz rakhne ke mutaliq yaqeenan aap ko maloom nahin ho ga tou aeye aaj ye seekhtay hain keh hum kis tarah se Allah ki is azeem naimat ko 100 saal tak mehfooz bana sakte hain.

Saudi Arab mein pahari ilaqon ke rehne walon ne ghizai mawad ko mehfooz rakhne ka aisa tareeqa apnaya hai jis ne jadeed technology ko bhi pechay chhor diya hai. Is article ke sath aik video bhi paish ki ja rahi hai jis mein bataya gaya hai keh khajoor ko kis tarah 100 bars se bhi zayada arsay tak mehfooz rakha sja sakta hai taham maloomat ke hawalay se mukhtalif halqon mein behs mubahsay ka bazaar garam hai.

Is hawalay se Saudi Arab ke shehar tabook mein qadeem wirsay se dil chaspi rakhne wali aik umar rasidah shakhsiyat ne bataya keh video mein nazar anay wala anookhay qisam ka bara sa tukra Alshanah kehlata hai aur hamare aaj ke dor mein ye apni ronaq kho chuka hai. Alshanah ko bakray ki khaal se banaya jata hai is ko pehle dho kar aur khushk kar ke phir pani mein geela kiya jata hai takeh woh lachak dar ho jaye is ke baad us ke andar khajoor rakhi jati hai.

Bazurg shakhs ne bataya keh Alshanah ke andar khajoor ko rakhne ke baad usay khajoor ke paton se band kiya jata hai. Is ke baad 1 hafta ya 2 haftay ya phir 1 maheena tak dhoop mein rakha jata hai takeh tamam sheera utar jaye. Ye khajoor ka nichor shehad ki manind hota hai is tarah khajoor Alshanah ke andar 100 bars tak mehfooz rehti hai. Bazurg shakhs ke mutabiq Alshanah un ke aba o ajdad ki ijad hai woh log khajoor se mutaliq peshay se wabasta thay lihaza Alshanah ko khajoor mehfooz rakhne ke liye istemal kiya jata tha us waqt log refregerator naam ki kisi cheez se waqif nahin thay.

zvr
Your Reaction

Leave a Comment