Advertise Here

Kobe Masjid History In Urdu Kobe City Japan Ki Pehli Masjid Ki Kahani

Kobe Masjid History In Urdu Kobe City Japan Ki Pehli Masjid Ki Kahani

Kobe Mosque Japan Ki Woh Tareekhi Aur Pehli Masjid Jisay America Ke Atomi Hathyar Bhi Gira Na Sakay
Kobe Masjid Japan ke shehar kobe mein waqe hai. Kobe shehar Japan ke sub se bare aur sub se zayada abadi wale jazeeray Honshu ke janoobi janib Osaka se taqreeban 30 km maghrib mein waqe hai. Aksar log nahin jantay keh Kobe shehar ka jurwan shehar jisay qarar diya gaya hai woh aik Pakistani shehar hi hai jis ka naam Faisalabad hai.

Kobe Japan ka wohi shehar hai jo amreeci atomi halmay ke baes buri tarah mutasir hua magar aaj is shehar ko dekhain aap ko yaqeen nahin aye ga keh Japan ne thoray se waqt mein phir se na sirf Hiroshima aur Nagasaki ko abad kiya balkeh is Kobe shehar ko bhi abad kiya yahan sanatain qaim kien, taraqi ke pahiye ko itni raftar se ghoomanay ka hi ye natija hai keh Japan aaj dunya ke bari maeeshaton mein shamil hota hai.

Aaj yahan khilay hue safaid khubsurat phool dekh kar lagta hi nahin keh yahan kabhi door door tak sirf tabahi o barbadi ke deeray thay. Kobe shehar ko aik azeem aizaz hasil hai keh yahan jo tareekhi masjid qube mojood hai ye Japan ki pehli masjid hai. Is masjid ko 1935 mein tameer kiya gaya tha. Ye Kobe Muslim Masjid ke naam se bhi jani jati hai. Is ki tameer Islami majlis counsil kobe ki janib se 1928 se 1935 mein mali ta’awun aur jama kardah atiyaat ke baes mumkin ho saki.

1943 mein Japani shahi behriya ne is Masjid par qabza kar liya tha. Taham baad mein is ki Masjid ki hesiyat phir bahal kar di gayi thi. Ye Masjid riwayati Turkey andaz mein tameer ki gayi hai aur isay aik mahir tameerat John Joseph Sawagar ne tameer kiya jo Japan mein mein bay shumar maghribi mazhabi imaraat ke mahir thay.

Amreeca ne Japan par jub atomi hamla kiya tha is bare mein tou aap ko maloom hi ho ga keh amreeca ne japan ke 2 shehron Nagasaki aur Hiroshima par atom bomb giraya tha is bare mein isi channel LalGulab.com par Japan par atomi hamlay ki aik puri video mojood hai agar aap ne woh video dekhi ho tou aap ko maloom ho ga keh Hiroshima aur Nagasaki mein kitni tabahi hoi thi lakhon log dekhtay hi dekhtay pighal gaye thay. Emaratain tabah o barbad ho gayien thi. Bare bare darakht jal kar rakh ho gaye thay. Puray shehar ko dhunwain ne apni lapait mein liye rakha tha. Lakhon logon ke atomi hamlay mein halak ho janay ke baad bhi kayi ghanton tak puri dunya ko maloom hi na tha keh atom bomb japan ke shehar par qayamat dha chuka hai. Magar usi tabahi o barbadi mein Kobe shehar ka ilaqa bhi shadeed mutasir hua tha aur abadi taqreeban buri tarah mit gayi thi. Lekin herat angez waqia ye hua keh yahan mojood Kobe Masjid ke sirf sheeshay tootay thay, maghribi deewar ke rang kharab hue thay aur deewaron par kuch dararain parien thien.

Charon taraf ka ilaqah malya mait ho chuka tha lekin Masjid apni jagah seenah tanay khari rahe. Japani sipahi is Masjid ke neechay panah gah mein chupay hue thay is surat haal ko dekh kar log atom bomb hamlay se bachnay ke liye is masjid mein ana shuru hue. Jang ke khatmay ke baad baaz Islami mumalik ne paish kash ki keh woh Masjid ki muramat karain ge. Is masjid ne tareekh ki sub se khaufnak atomi tabahi tou bardasht kar li par baat yahin khatam nahin hoti is masjid se aik aur waqia bhi jura hai. Ye Kobe Masjid aik aur mojza bhi dikha chuki hai keh 17 january 1995 ko Japan mein aik holnak zalzala aya tha jis ne 20 second mein tabahi macha di thi aur taqreeban 6500 afrad halak ho gaye thay un mein aksariyat isi Kobe ke ilaqe se thi lekin aik baar phir se is masjid ko koi nuqsan nahin pohanchah yunh ye masjid Atom Bomb aur Zalzalay mein bhi mehfooz rahi aur aaj tak seenah tanay khari hai.

zvr
Your Reaction

Leave a Comment