Advertise Here
Cities Documentaries History Information

Manchester History In Urdu Documentary Manchester Information In Hindi

Manchester History In Urdu Documentary Manchester City Information In Hindi

Kehte hain waqt kisi ka intzar nahin karta lekin englistan mein tou gari bhi kisi ka intezar nahin karti aur yehi wajah hai keh yahan se trainain hasb e programe ain waqt par dusre shehron mein pohanch jati hain.Bartania ke maroof aur qadeem shehar London se bazariya car agar Manchester ka safar kiya jaye tou 5 se 6 ghantay lagte hain. Agar bazariya bus London se manchester pohancha jaye tou 5 se 7 ghantay tak lag sakte hain jabkeh train sirf 2 ghantay aur 10 minute mein aap ko London se Manchester shehar mein pohancha deti hai.

Manchester pohanchte hi jub yahan ki purani emaraton par nazar parti hai tou ye qadeem emaratain bartania ki tareekh ka pata deti hai. Manchester ke asman par agar badlon ka qabza na ho tou In emaraton ke peechay se jhanktay hue suraj ki sunehri kirnain bhi in emaraton ki khubsurati aur barha deti hain aur yunh ye nazaray yahan anay walon ka khoob istaqbal kartay dikhai detay hain.

Kaha jata hai keh bartania ka mausam lamhon mein aisi karwat laita hai keh dekhte hi dekhte asman ka rang badal jata hai, Falaq par muskurata hua suraj ho ya khubsurat badlon ke sath thandi hawain aur rim jhim log yahan in tamam lamhaat ko khoob enjoy kartay hain.

Manchester bartania ke sub se mashoor shehar London se taqreeban 257 km ke faslay par waqe hai. Manchester ke mazafaat mein Liverpool, Blackpool aur Lancashire jese shehar hain. Shumali bartania mein waqe Manchester aik tareekhi, khubsurat aur aham shehar hai jo dunya bhar mein mashoor hai.2006 ke aik survey mein manchester ko karoobar ke lihaz se bartania ka behtareen shehar qarar diya gaya tha. 2007 ki aik report ke mutabiq manchester bartania ka tezi se taraqi karta hua woh shehar hai jahan bari tadad mein mulazmat ke mawaqe paida ho rahe hain.

17th sadi ke akhir mein manchester chand afrad ke sath aik chota sa gaon tha. 1780 mein yahan Richard Arkwright nami aik shakhs ne pehli cotton mill qaim ki is ke baad 18th sadi mein manchester kapas ke hawalay se dunya ki sub se aham sanati basti ban kar ubhra is ke natijay mein manchester dunya ka sub se pehla sanati ilaqa ban gaya. 19th sadi ke aghaz mein kar khanon ki tameer mein izafay ne manchester ko tabdeel kar ke aik choti basti se aik aham karkhana dar shehar bana. Sun 1984 mein yahan ki ma’aroof manchester ship nehar ka iftitah hua jis se yahan bandargah bani aur is ke baes yahan tijarati behri jahazon ka ana jana shuru hua. Manchester shehar mein bohat si nehrain aur darya hain jin ka is shehar ki ibtidai taraqi mein bara hisa raha hai.
Woh shehar jinhain manchester ka jurwan shehar qarar diya jata hai un mein Germany ka shehar Chemnitz, Spain ka Cordaba, Israel ka Rehovot, Russia ka Saint Petersburg, China ka Wuhan aur Pakistan ka shehar Faisalabad shamil hai.

Manchester Ke 14 Hairat Angez Haqiaq Bhi Parhain

Manchester mukhtalif mulkon ke logon ki tehzeeb o tamadan ki amajgah bhi hai yahan ki kul abadi ka aik bara hisa tarkeen watan ki abadi par mushtamil hai. Aik andazay ke mutabiq bartania mein muqeem Pakistaniyon ki kul abadi ka 10% se zayada hisa manchester mein rehaish pazeer hai. Deegar tarkeen watan mein Bangladeshi, hindustani, nepali aur Arab mumalik ke log shamil hain. Saal 2013 ki mardam shumari ke mutabiq manchester ki abadi 25 lack se zaid hai jin mein Pakistani afrad ki tadad 45000 ke qareeb hai jo keh 2011 mein 42900 thi.

Agar aap kabhi bartania ke is tarikhi shehar manchester jayain tou yahan ka wasi o areez Heaton Park dekhna mat bhoolain ye park 618 acre raqbe par pheela hua hai aur is shehar ka behtareen picnic point mana jata hai. Is park ki dekh baal par taqreeban 10 million pounds lagat aa chuki hai. Yahan tennis aur golf kheenlay ke sath sath mukhtalif jangli janwaron ko bhi dekha ja sakta hai. Is ke ilawa yahan aik jheel bhi hai jahan kashti ki sair bhi ki ja sakti hai jo aap ke liye manchester shehar ki haseen yaad ban sakti hai.

Bartania mein aam shehriyon ko hasil sahooliyat ki baat ki jaye tou Bartanwi hukumat apne shehriyon ki falah o behbood ke liye bohat sari sahooliyat faraham karti hai. Khas tor par burhon, bachon aur kamzooron ke androon e mulk safar ke liye khasoosi mara’ati packages hote hain. 60 saal se bari umar ke shehri London shehar mein bazariya bus, train aur tram mein muft safar karte hain jabkeh aise afrad ko bartania ke dusre shehron mein bhi riayati ticket ki sahoolat hasil hai. Agar koi shehri zayada bimar hai tou us ko riayati ticket ke ilawa us ki dekh bhaal karne wale ko bhi riayati ticket ki sahoolat faraham ki jati hai. Yeh sahooliyat bartania ki hukumat Manchester mein bhi faraham karti hai.

zvr
Your Reaction

Leave a Comment