Advertise Here
Biography Brands History Interesting Life Stories Personalities Restaurants Stories Videos

Marriott Hotel History In Urdu Marriott Hotel Success Story Hindi

Marriott Hotel History In Urdu
Written by Admin

Marriott Hotel History In Urdu Marriott Hotel Success Story: Marriott Hotel Ki Kahani – John Willard Marriott aaj se 117 saal pehle 17 september sun 1900 ko amreeca mein paida hua. Us ke baap ka aik farm tha jis mein us ne maweeshi paal rakhe thay. Marriott joun joun bara hota gaya us ka aksar waqt apne baap ke sath farm par kaam karte guzarne laga. Jub Marriortt school se wapis aata tou us ka baap usay apne sath kaam par lay jata. Us ka baap maaldar honay ke bawajood nokaron ke sath khud kaam karta tha aur apne betay ko bhi kaam mein lagaye rakhta tha aur jub kabhi usay kahin jana hota tou farm ki zumadari marriott ko sonp deta keh woh us ki ghair mojoodgi mein dekh bhal aur nighedasht kare.

Aye roz ki zumadariyon aur kamon se pur zindagi se marriott bohat tang aa chuka tha. Jub woh school jata tou us ke ham jamat chutti ke baad kheel kood ka programe banatay aur kabhi picnic mananay ke mansoobay banatay, lekin marriott khawahish ke bawajood apne doston ke sath kheel kood pata na picnic mananay ja sakta tha. Us ke sathi mazaq bhi uratay keh ye apne baap ke farm par kaam kartay kartay apna mustaqbil tabah kar baithay ga usay apne career ki fikar nahin. Unhain kya maloom tha keh baap ki sakhti jheelnay wala apna mustaqbil aur naam roshan kare ga. Unhain kya pata tha keh farmanbardar beton ka mustaqbil kabhi tareek nahin hua karta. Unhain kya samajh thi keh aqal mand baap apne beton ko awara ke bajaye masroof dekhna chahte hain. Taleem ke sath unhain apna koi pesha bhi sikha detay hain jo insan ki zindagi mein mushkil waqt anay par bohat mufeed sabit hota hai.

Marriott apne doston ki baton se tang agaya tha. Akhir aik din us ne apne baap ke samne woh sub kuch ugal diya jo kafi arsay se us ke andar hi andar pak raha tha. Us ne apne baap se kaha keh mere doston aur hum jamaton ke waldain tou un se itna pyar aur mohabbat karte hain lekin aap mere liye aisa nahin karte. Abhi meri umar hi kya hai keh mujhe har waqt bail ki tarah kaam mein lagaye rakhte hain. Taqat se zayada mere uper zumedari ka bojh lada jata hai. Marriott ki ye batain sun kar us ke baap ne usay koi jawab dene ki bajaye usay apne seenay se lagaya aur kaha keh waqt aap ke sawalon ka jawab de de ga.

Aik din martriott ke baap ne marriott ko bula kar kaha keh mujhe san fransisco mein rail kar ke zariye 3000 bheerain bheejni hain mera dil chahta hai keh aap jayain aur safar se lutf andooz hon aur san fransisco ki sair o sayahat bhi kar lain. Baap ke munh se ye sun kar marriott bohat khush hua aur waldain ki duain lay kar woh apne safar par rawana ho gaya. Ye safar us ki soch se kahin zayada mushkil tha us waqt marriott 14 saal ka tha. Is safar se woh lutf andooz tou na ho saka par is safar ne us ke liye amli zindagi mein qadam rakhna asan bana diya. Is safar ke doran puranay sawalat ka jawab mil gaya yehi safar us ki kamyabi ka pehla zeenah tha.

Is ke baad marriott ne apni collage life mein hi business shuru kar diya. Us ne is doran bohat sare karoobar kiye kisi aik ko mustaqil ikhtyar na kiya lekin us ke andar jazba tha keh woh aisa business kare ga jo us ke liye munafa bakhsh aur mulk o millat ke liye mufeed ho.

Aik dil woh collage se wapis araha tha jub woh chowk mein pohancha tou dekha keh logon ka aik jam e ghafeer hai jo aik cabin numa gari ke aas paas jama hai. Log wahan se ice cream waghera khareed kar kha rahe thay. Dekhtay hi dekhtay woh ice cream aur degar khanay peenay ki cheezain khatam ho gayien. Is chotay se business se mutasir ho kar marriott ne azam kar liya keh woh hotel khoolay ga aur us mein aisa intezam kare ga keh log baith kar aur aram se khana kha sakain.

Marriott ne apne naam par hi marriott hotel khoola usay khoob nafa hua us ne apne hotel par mulazmeen rakh liye. Is munafa bakhsh karoobar ko dekh kar marriott ne hotel khoolnay shuru kar diye. Us ke hotelon ki tadad ke sath sath mulazmeen bhi barhtay gaye. Ab dunya ke 122 mumalik mein us ki properties ki tadad taqreeban 6000 se zayada hai. In ki salana amdani 5 arab dollar aur mulazmeen ki tadad 2 lack ho chuki hai. Marriott apni kamyabi ka sehra apne walid ko deta hai jis ne usay bachpan se mehnat karne ki adat dali jisay woh bachpan mein sakhti aur zulm samajhta tha.

Leave a Comment