Advertise Here
Documentaries Interesting Special Universe

Moon Landing In Urdu Documentary Kya Chand Par Insan Gaya Tha

Moon Landing In Urdu Documentary Chand – Ye sadiyon purana silsila hai keh khulay asman talay tanha ratain guzarnay walon ka asal sathi chand hi raha hai. Insan aur chand ka ye rishta sadiyon purana hai. Ye chand hi hai jo raton ka husn hai, ye chand hi hai jo eid ka pata hai. Ye chand hi hai jisay dekh kar shaiyon ne apne mehboob ko bhi chand bana rakha hai. Magar khuch shairon ne tou ye keh kar khud ko bhi chand samajh rakha hai keh:

Tanha Tanha Rehta Hai
Chand Bhi Mere Jesa Hai

Insan chand ko zameen par baith kar hi dekhta raha hai magar aaj se 48 saal pehle aik aisa lamha bhi insani tareekh mein aya tha jub zameen par baitha hua insan achanak chand par ja pohanch tha. Ye kaise hua keh zameen ke jungalon, paharon, sehraon aur samandaron ke kinaron par zindagi basar karne wala insan khud se 384,400 km door apne raton ke sadabahar sathi chand tak ja pohanca? akhir ye kya majra tha aaj hum yehi jannay ki koshish karain gey keh kya insan waqai chand par utra tha? kya nasa ki faraham karda woh video aur tasaweer jo chand par utarnay ke bare mein thi kya waqai woh chand ki hi video aur tasweerain thien ya ye sub kuch puri dunya ke sath aik mazaq tha jo 20 sadi ka sub se bara dhoka tha. Aaeye ye suragh laganay ki koshish kartay hain keh 20 july 1969 ki raat neil armstrong chand par utra tha ya amreeca ke kisi pahari ilaqe mein.

Is se pehle keh hum chand ki taraf apna safar shuru karain hum zameen par hi thehar kar tareekh ki wadiyon mein jankhtay hain aur ye jannay ki koshish kartay hain keh 25 may 1961 ko kya hua tha kyun keh ye wohi din hai jub amreeca ne chand par pohanchnay ke bare mein sochna shuru kiya tha.

Moon Landing History In Urdu

Ye aaj se 56 bars pehle ki baat hai jub 25 may 1961 ko us waqt ke amreeca ke sadar john f kaneddy ne congress se khitab kiya tha jisay television par bhi nashar kiya gaya tha us khitab ne bohat se amreeciyon ko hairan kar diya tha. John F Kennady ne apne khitab mein kaha tha:

“Mere khayal mein hamari qaum ko ye hadaf hasil karne ka azam karna ho ga, is se pehle keh ye ashrah beet jaye. Aur ye hadaf hai chand par insan ke qadam rakhne ka aur bahifazat zameen par wapis pohanchne ka.”

Ye woh taqreer thi jis ne amreeca ko ye sochnay par majboor kiya tha keh woh kisi bhi mulk se pehle chand par qadam rakh kar khalai jang mein apni jeet ka wazeh ilan kar sake. Magar us waqt amreeca ke liye chand par jana aik khwab sa tha aur ye itna hi mushkil tha jitna keh chand zameen se door hai. Nasa ki justuju khala mein mutadid mission rawana karna reh gaya tha jin mein se har aik pecheeda tar tha, har aik ka maqsad chotay ibtidai kaam karna tha, takeh aik din chand par qadam rakhna mumkin ho. Par chand par qadam rakhna us waqt amreeca ke liye mumkin nahin tha lekin woh har haal mein dunya ko ye batana chahta tha keh hum sub se pehle chand par pohanch chukay hain is ke liye woh kisi had tak bhi ja sakta tha chahe is ke liye usay dunya se jhoot hi kyun na bolna parta.
Aur phir woh din bhi aan pohancha jub amreeci khalai jahaz Apollo 11 ne 16 july 1969 ko kennady space center se apne tareekhi safar ka aghaz kiya aur 4 din ke baad 20 july 1969 ko amreeca ne insan ke chand par qadam rakhne ka dawa kiya aur amreeca ne chand par utartay hue apne 2 khala bazon ko dunya bhar mein tv screen par dikhaya us manzar ko 50 crore se zayada logon ne dekha tha.

Chand par amreeci khala bazon ki chehal qadmi dekh kar puri dunya herat mein doob chuki thi kisi ko yaqeen nahin araha tha keh insan zameen se lakhon km door chand tak kaise pohanch gaya log apne tv screen par nazar anay wale manazir ko intihai ghoor se dekhtay rahe aur chand ke bare mein mazeed jannay ki koshish karta rahe. Amreeci qaum fakhar se dunya ko batati rahi keh ham chand tak pohanch chukay hain aur amreeca khalai idara nasa ye dawa karta raha keh us ka khalai jahaz na sirf chand par utra hai balkeh hamare 2 khala bazon ne chand par chehal qadmi bhi ki hai aur jo insan sub se pehle chand par pohancha tha us ka naam Niel Arm Strong tha jinhon ne chand par kuch tasaweer banaien, amreeca ka jhanda chand ki zameen par gara aur chand ki satah se pathron ke chand namoonay liye. Is ke ilawa unhon ne aik loh bhi nasab ki jis par darj tha keh ye woh jagah hai jahan sayarah zameen se aa kar insan ne pehli martaba qadam rakha aur jo puri insaniat ke liye aman ka aik paigham lay kar yahan aya hai.

Un donon khala bazon ne chand par dhai ghantay guzaray aur is ke baad woh khalai gari eagle ke zariye chand ke gird chakar lagatay hue apolo 11 jahaz tak pohanchay aur phir 24 july 1969 ko wapas zameen par laut aye.

Lekin kuch hi salon mein khud amreeca mein is baat par shak o shubah zahir kiya jane laga keh kya waqai insan chand par utra tha. Woh 15 february 2001 ka din tha jub Fox Tv Network se nashar honay wali 45 minute ki aik dastawezi film ne dunya bhar mein bohat se logon ko ye sochnay par majboor kar diya keh kahin amreeca ne 20 july 1969 ko un ke sath jhoot tou nahin bola. Us dastawezi film ka naam Conspiracy Theory: Did We Land on the Moon tha. Is documentary ko fox tv network ne 19 march 2001 ko dobara nashar bhi kiya tha.

Waqt guzarnay ke sath sath un logon ki tadad mein izafa hota raha jo ye mantain hain keh aaj tak koi insan chand par nahin pohancha. Aksar logon ka khayal hai keh ye sub jhoot hai aur ye sara waqia amreeca ne apni aik riyasat mein filmaya hai.

Kya Insan Chand Par Pohancha Tha? Fake or Real?

Chand ki taskheer par uthaye janay wale chand aham aitrazaat kya hain aeye jantay hain.

Pehla Sawal – Jub khala baaz chand par amreeci parcham laga rahe thay tou woh lehra raha tha jub keh chand par tou hawa hai hi nahin tou phir kaise amreeci parcham chand par lehrata raha.

Dusra Sawal – Chand ki satah par kharay ho kar khala bazon ne jo tasweerain khenchi thien un mein kahin bhi sitare dikhai nahin de rahe thay jub keh pas e manzar mein sayah asman dikhai de raha tha.

Teesra Sawal – Chand ki satah par utartay waqt chand gari ki jo tasweerain khenchi gayien thien un mein us jagah par koi garha dikhai nahin de raha tha jahan chand gari utri thi.

Chootha Sawal – Chand Gari ka wazan 17 ton tha lekin phir bhi chand ki satah par us ka koi nishan nahin para jub keh us ke qareeb hi khala bazon ke qadmon ke nishan rait pa saaf dikhai de rahe thay.

Panchwan Sawal – Chand par jahan na tou nami hai na hi koi fiza hai aur na hi zayada kashish saqal hai phir bhi us ki matti par qadmon ke nishan ghair matwaqa tor par bohat achi tarah kyun mehfooz ho gaye goya woh kisi geeli rait par banay hon.

Chata Sawal – Jub chand gari eagle ne chand ki satah par se parwaz ki tou us ke rocket se koi bhi shola nahin dikhai diya jub keh rocket ke urtay hue is mein se shola zaroor nikalta hai.

Satwan Sawal – Chand ki satah par chehal qadmi kartay hue khala bazon ki film ko agar aap tez raftar se chalayain tou woh aisa dikhai deta hai goya us ki film bandi zameen par ki gayi thi aur phir us film ki raftar kam kar di gayi thi.

Athwan Sawal – Khala bazon ko chand ke us safar mein zameen ke ird gird waqe aik intihai tabkar daire se guzarna para jahan se un ka zinda bach kar zameen par wapas ajana mumkin nahin ho sakta tha.

Nowan Sawal – Chand se laye janay wale pathar bilkul antarctica mein scienci tehqeeqat ke doran ikathay kiye janay wale pathron jese hain.

Daswan Sawal – Agar 1969 mein amreeca chand par pohancha tha tou tab se lay kar ab tak amreeca dobara chand par kyun na pohanch saka. Ab tak tou wahan mustaqil qayam gah ban chuki hoti magar muamla is ke bar aks hai aur chand par janay ka silsila arsa daraz se kisi maqool wajah ke baghair band para hai.

Gayarhwan Sawal – Zameen ke bohat nazdeek khalai madaron mein janay ke liye insan se pehle janwaron ko bheja gaya tha aur puri tasali hone ke baad insan madar mein gaye lekin herat ki baat hai keh chand jesi door daraz jagah tak pohanchnay ke liye pehle janwaron ko nahin bheja gaya aur insanon ne barah e rast ye khatra mool lay liya.

Barhwan Sawal – Chand par insan ki pehli chehal qadmi ki film ka signal dunya tak tarseel ke baad slow scan television format par analog tape par record kiya gaya tha un tape par tele metry ka data bhi record tha. Aam ghareelu tv us format par kaam nahin karte thay is liye 1969 mein us signal ko nihayat bhoonday tareeqay se aam tv par dekhe janay ke qabil banaya gaya tha.

Terhwan Sawal – Jub nasa se SSTV ke asli tape mange gaye tou kyun Nasa aaj tak asli tape paish nahin kar saka.

Akhri Sawal – Chand par janay aur wahan istemal hone wali machinon ke blue print aur tafseeli drawings achanak kahan ghaib ho gayien.

21 december 1968 mein NASA ne Apollo 8 ke zariye 3 khala baaz chand ke madar mein bhejay jo chand ki satah par nahin utray. Ghaliban ye NASA ka pehla jhoot tha aur tab kisi ne us par shak nahin kiya tou amreeca ne puri dunya ko baywaqoof banatay hue insan ke chand par utarnay ka ye drama rachaya aur zameen par chand ki jali film bana kar dunya ko dikha di. 1994 mein Andrew Chaikin ki ak kitab chapi thi jis ka naam A Man on the Moon tha us kitab mein bataya gaya tha keh aisa aik drama rachanay ki bazgasht december 1968 mein suni gayi thi.

Par agar waqai mein amreeca chand par nahin pohancha tha tou puri dunya mein chand par pohanchnay ka drama kyun rachaya gaya aeye ab is bare mein jaan laitay hain. Amreeca ke atomi hathyar rus ke atomi hathyaron se zayada behtar aur chotay size ke thay is liye unhain missilon mein istemal karne ke liye chotay rocketon ki zaroorat parti thi. Is ke bar aks rusiyon ko apne bhari atomi hathyaron ke liye bohat bare rocketon ki zaroorat thi aur is wajah se rusi rocket sazi mein amreeca se kahin agey nikal gaye thay. Amreeca ko shadeed khatra tha keh na sirf us ke ilaqe rusi atomi hathyaron ki zad mein hain balkeh sard jang ki wajah se shuru hone wali khalai dor mein bhi unhain maat hone wali hai. Vietnam ki jang mein nakami ki wajah se amreeciyon ka moral bohat nechay agaya tha.

Pehla masnoi sayarah khala mein bhejnay ke muamlay mein rus ko sabqat hasil ho chuki thi jub us ne 4 october 1957 ko apne masnoi sayare ko kamyabi ke sath zameen ke madad mein bheja tha. Is ke 2 saal baad rus baghair insan wale khalai jahaz chand tak pohancha chuka tha. 12 april 1961 ko rusi khala baz Yuri Gagarin ne 108 minute khala mein zameen ke gird chakar kaat kar khala mein janay wale pehle insan ka aizaz hasil kiya tha. 23 din baad amreeci khala baz Aan Shepard khala mein gaya magar woh madar tak nahin pohanch saka tha. Un halaat mein qaum ka moral barhanay ke liye us waqt ke amreeci sadar ne ye dawa kiya tha keh hum chand par utar kar bakhairiyat wapis bhi ajayain ge. Bohat se logon ka khayal hai keh is baat ko pura karna amreeca ke liye mumkin nahin tha is liye izzat bachanay aur bartari jitanay ke liye usay jhoot ka sahara laina para. Amreeca ke aik rocket saz adaray mein kaam karne wale shakhs Bill Kaysing ke mutabiq us waqt insan bardar khalai jahaz ke chand se sahi salamat wapis anay ke imkanat sirf 0.017 fesad thay. Us ne Appolo mission ke ikhtitam ke sirf 2 saal baad yani 1974 mein aik kitab shaya ki thi jis ka naam tha We Never Went to the Moon: America’s Thirty Billion Dollar Swindle.

Nasa ne hamesha aise aitrazat ki tardeed ki aur 2002 mein nasa ne james oberg nami shakhs ko 15000 dollar is baat par inaam diye keh us ne chand par pohanchne ko nasa ka drama kehne walon ke aitrazat ka nuqtah ba nuqtah jawab diya. Magar is ke bawajood ab dunya mein un logon ki tadad mein tezi se izafa hota ja raha hai jo ye mantay hain keh 20 july 1969 ko amreeca ne puri dunya ko bari chalaki se bewaqoof banaya tha.

zvr
Your Reaction

Leave a Comment