Advertise Here
Documentaries Pakistan Places Tourism

Mubarak Village In Urdu Documentary Mubarak Village Karachi

Mubarak Village ya Goth Beach woh jagah hai jahan qudrati husn aur ghurbat sadiyon se sath rehtay hain. Karachi se lag bhag 30 km ke faslay par waqe is sahili basti ki abadi taqreeban 4000 nafoos par mushtamil hai aur is ke makeen Pakistan ke taraqi yafta shehar ke paros mein abad honay ke bawajood zindagi ki bunyadi sahooliyat se mehroom hain.

Aksar saiyah karachi shehar se raat gaye nikaltay hain aur Mubarak village ka nisf safar dilkash suraj talu hone ke waqt tay kar letay hain. Aise saiyahon ko Asman par paharon ke aqab se pheelti sunehri kirnain aur sard hawayain khush amdeed kehti hain. Ye fishing village har us fard ke liye behtareen jagah hai jo fitrat ka shoqeen ho. Ye karachi ka dusra bara mahi geer gaon hai jis ki sarhadain balochistan se lagti hain yahan ke nazaray sunehri chatanon aur neelgon sfafaf pani ke anojhay imtizaj ke gheeray mein liptay nazar atay hain. Shehar ke shor o ghul se door ye maqam aap ka bay panah muhabbat ke sath istaqbal karta hai.

Yahan ke rehaishiyon ke paas kuch nahin magar phir bhi ye apni zindagi se mutmaen hain agar hukumat yahan ke maqami logon ki zindagi ki behtari ke sath sath is ilaqe par bhi tawajah de tou yahan ki khubsurati mein mazeed izafa ho ga. Yahan samandar ki khubsurati aur dehatiyon ki garam joshi saiyahon ke liye apne zehan ko bay lagam chhor dene ke liye behtareen maqam hai aur ye maqam un logon ke liye zayada ahmiyat rakhta hai jo machli ke shikar ka shoq rakhte hain.

Jese hi aap sahil ke qareeb pohanchtay hain yahan sheeshay ki tarah shafaf pani mein dolti langar andaz kashtiyan nazar anay lagti hain. Pur josh bachay ird gird bhag rahe hote hain aur gari se qadam bahir nikaltay hi ye maqam insan par hawi honay lagta hai. Samraj dor se pehle ki ye basti abhi bhi bunyadi zarooriyat jese saaf pani tak risai, bijli, gas, tibi sahooliyat aur taleem wagera se mehroom hai.

Yahan ke basiyon ki aksariyat ka rozgar mahi geeri se jura hai magar kisi aur jagah ke mahi geeron ke muqablay mein yahan ke rehaishi fishing net ki bajaye apni amdani sports fishing ke zariye hasil karte hain. Beshtar mahi geeron ke rozgar ka inhsar choti kashtiyon par hai jinhain riwayati tareeqay se tayar kiya jata hai aur woh tofaani mausam mein safar karne ki salahiyat nahin rakhtien. Is ke natijay mein ye mahi geer moonson ke doran apni sargarmiyan motal kar dete hain aur apne ilaqe ke qareeb waqe ground mein football matches kheel kar apna waqt guzarnay lagte hain.

Sahir par taeenat aik life guard ne bataya keh yahan zindagi asan nahin hai jub season ata hai tou hamain paise miltay hain lekin jub samandar biphra hua hota hai tou yahan koi nahin ata auur is mausam mein machliyan bhi nahin hotien keh guzara kiya ja sakay. Wazeh rahe keh hukumat fishing sector se har saal arbon rupay kamati hai lekin hukumati idaron ki janib se mahi geeron ko hamesha hi nazar andaz kiya jata raha hai aur isi sabab mahi geer aaj ke is taraqi yafta door mein bhi intihai bad hali ki zindagi guzarnay par majboor hain.

Ye Pakistan mein mahi geeron ki dusri sub se bari basti hai yahan samandar ke nazaray shor sharabay ki zindagi se door sakoon ke kuch lamhaat jeenay ke liye behtareen hain.

zvr
Your Reaction

Leave a Comment