Advertise Here
Essays

Pakistani Culture Essay In Urdu Culture Of Pakistan Provinces And Society In Urdu

Pakistani Culture Essay In Urdu
Written by Admin

Pakistani Culture Essay In Urdu Culture Of Pakistan Provinces And Society In Urdu

Pakistani saqafat ki baat ki jaye tou ye kehna ghalat nahin ho ga keh hamara mulk aur qaum jis saqafat ko bayan karte hain woh sadiyon purani hai. Jo humain hamare aba o ajdaad se wirasat mein mili hai lekin Pakistani saqafat ki sub se bari aur khas baat ye hai keh is mein mukhtalif tehzeebon ne shamil jo kar is ke rang ko mazeed nikhar dala hai. Isi liye kahin kashmiri rang ujagar ho jata hai tou kahin pushtu, kabhi sindhi soofyana rang jhalakta hai aur kabhi punjab ki mohabbat umad aati hai. Aeye Pakistan ki saqafat ke chand aham anasar ka jaeza laite hain.

Aham Alaqay
Pakistan ki sar zameen intihai khubsurat aur qeemti khazanon se mala maal hai mulk mein khubsoorat shehar Islamabad ko keh mulk ke taqreeban wust mein mojood hai Pakistan ka darul hukumat kehlata hai is ke bare shehar Lahore, Karachi, Peshawar hain.

Mazhab
Islam ke naam par banaye gaye is mulk mein basnay wale logon ka mazhab Islam hai aur is mein basnay wale 95% log paidaeshi tor par Musalman hain lekin kyoun ke hamare mulk ke jhande mein aqliyat ka rang bhi numayan hai lihaza yahan hindu, aur esai mazhab ke perokar bhi bastay hain jo apne apne aqaid ke mutabiq zindagi guzartay hain.

Zuban
Pakistan mein urdu qaumi zuban ki hesiyat rakhti hai magar yahan mukhtalif qaumain jin mein punjabi, balochi, saraiki, pathan, sindhi, pothohari shamil hain, apni apni zubanon mein bolna pasand karte hain aur apne makhsoos alaqon mein apni madri zuban hi bolte hain. Punjab mein rehne wale punjabi, sindhi mein basnay wale sindhi aur paharon mein basnay wale logon ki madri zuban pothuhari hai. Jabkeh Pakistan ke medani alaqon mein basnay wale log saraiki zuban boltay hain is ke sath sath sarhadi alaqon mein rehne wale log pashto zuban ke hamil hain. Angreezi zuban kyun ke puri dunya mein boli aur samjhi jati hai is liye Pakistan mein bhi english zuban ko khasi ahmiyat hasil hai.

Pehwanay (Libas)
Pakistani logon ke pehnaway Islamic culture ki akasi karte hain aur apni riwayat ke hisab se log sada, jadeed libas bhi pehantay hain. Pakistan ka qaumi libas shalwar kameez hai jisay khawateen aur mard donon hi shoq se pehantay hain is ke ilawa naye fashion ke hisab se khawateen frock aur pajama bhi pehanti hain. Mard shalwar kameez ke ilawa pent shirt pehanna bohat pasand karte hain.

Aham Shehar
Pakistan mein basnay wale logon ki tadad 135 million hai jis mein se 49 million afrad Pakistan ke bare shehron mein rehaish pazeer hain. Bohat se qabaili log wadiyon mein bhi bastay hain jis mein wadi chitral aur swat khasi aham hain. Is ke ilawa bhi Pakistan mein dusri mashoor aur khoobsurat tareen wadiyan bhi mojood hain jese kailash waghera.

Khanay
Pakistani khanon ki baat ki jaye tou Islami mulk hone ke natay yahan basnay wale log sirf wohi cheezain khatay hain jin ko Islam mein halal qarar diya gaya hai. In mein tamam sabziyan aur phal shamil hain is ke ilawa gosht mein murghi, bakra, machli khayi jati hai lekin aaj kal pronz (jheengon) ka istemal bhi batoor khorak barh raha hai. Pakistan khanon mein maslahon kafi zayada rakhi jati hai kyun ke yahan ke basne wale log tez masalhon ke bohat zayada shoqeen hote hain. Hamare khanon mein lal mirch, garam masala, haldi powder, lehsun adrak, pyaz aur bohat si iqsam ke garam masala jaat pasand kiye jate hain jis mein meethay aur namkeen donon qismain shamil hain lekin biryani aur palao ko khas tor par pasand kiya jata hai aur eid ho ya tehwar hamare dastar khawan biryani aur palao ke baghair adhooray se lagtay hain.

Tehwar
Aik Islami mumlikat hone ki wajah se Pakistan mein tamam Islami tehwar bare josh aur aqeedat ke sath manaye jatay hain jis mein 12 Rabi ul Awal, Shab e Barat, Ramadam, Shab e Qadar, aur Eid jese aham dinon ko aqeedat se manaya jata hai is ke ilawa dusre mazhab ke basnay wale log bhi Pakistan mein apne tehwar manatay hain jese christmas, holi aur dewali. Is ke ilawa qaumi tehwar bhi puray josh aur walwalay se manaye jate hain. Jis mein youm e Pakistan, defence day aur qaid ki wiladat ka din manaya jata hai aur in tamam dinon mein mulk bhar mein sarkari tateelat bhi hoti hain.

Kheel
Pakistan mein kheelay jane wale kheelon mein circket aur hockey bohat shoq se dekhe aur kheelay jate hain is ke ilawa har saal shandoor mein lagne wala polo ka mela hazaron sayahon ko apni janib khenchta hai aur polo mein hum aik waziha bartari bhi rakhte hain.

Handicraft
Pakistan ke handicraft aur hath se banai gayi dusri cheezain dusre mumalik mein bohat pasand ki jati hain. Khas tor par ye Pakistani qaleen aur Pakistan ka chinniot ka furniture bahir ke mumalik mein bohat mang rakhta hai. Lekin in sub ke bawajood Pakistan ka culture pichlay chand salon mein kahin kho sa gaya hai log apni barson purani rasoomat ko bhoola kar maghribi aur humsaya mumalik ki fazool riwayat per amal karne lage hain. Aaj hamare haan shadi aur degar rasoomat mein hindu aur american toor tareeqay aur pehnaway zayada nazar atay hain aur hum apne Islami tenwaron ko bhoola kar basant, new year night aur valentine’s day bohat khushi khushi manatay hain. Hamare mulk mein 30 se 40% afrad American style mein bolne un ke style ke fashion apnanay aur un ki tarah bartao karne mein apna sani nahin rakhte. Bache aur nojawan nasal hollywood ki films dekh kar bohat zayada ghalat riwayat ka shikar ho chuke hain. Jis mein sharab, sheesha, cigrette ka istemal aur ghalat websites ka rujhan barh raha hai.

American culture ko dekhte hue hamare nojawan larkay aur ladkiyon mein aaj kal aik dusre se dosti barhne lagi hai aur is ki sub se bari wajah mobile phones aur facebook ka aam barhta istemal hai halankeh hamare mazhab Islam mein hargiz is baat ki ijazat nahin hai.

In sub wajuhat ki bana par hamare maushray se hamari sadiyon purani saqafat khatam hoti ja rahi hai. Woh saqafat jo puri dunya mein hamari pehchan thi hum fakhar se kehte thay kehte thay keh hum Musalman hain aur hamare aba o ajdad ne apni riwayat aur saqafat ko bachane ke liye bohat se qurbaniyan de hain. Lekin aaj hum kisi bhi beroni riwayat, fashion ya kisi bhi chez ko apnatay waqt aik pal ke liye bhi nahin sochte keh infaradi rawaiye mil kar hi kisi qaum ki saqafat ko banate hain. Agar hamare bol chal, rawaiyon aur tehzeb o tamadan mein dusri qaumon ki banai gayi rawayat nazar ayain gi tou hamari riwayat ka kya ho ga? kya hum jidat ko apnane ki khawahish mein apni saqafat ko bhool jayain ge. Zaroorat hai tou sirf sochne ki dusron ke tor tareeqe par amal karna buri baat nahin hai lekin humain apni tehzeeb ka daman bhi nahin chhorna chahiye. Aur is ke liye ye bohat zaroori hai keh hum apni saqafat apni riwayaat ko thamay rahain agar qadeem riwayat ke naam per humain khuch badalna hi hai tou hum un riwayat ko badlain jinhon ne humain aik wehshi qaum bana dala hai agar aaj auraton ko izzat de dain unhain un ke huqooq de dain, bachon ke naram hathon ko waqt ki bay reham chaki mein na dalain tou hum anay wali naslon ko tohfay mein apni behtareen aur qabil e izzat riwayat de sakte hain.

culture of pakistan in urdu
history of pakistani culture in urdu
pakistani culture and society
paragraph on pakistani culture history in urdu
pakistani culture par mazmoon

Leave a Comment