Advertise Here
Cities Facts Information Pakistan

Quetta Information In Urdu Quetta City Facts Quetta Ki Maloomat

Quetta Information In Urdu – Aaj Pakistan ke khubsurat shehar Quetta ke bare mein dilchasp maloomat jantay hain. Quetta Pakistan ka aik aisa shehar hai jisay charon taraf se paharon ne gheer rakha hai. Quetta ka shumar Pakistan ke aham aur tareekhi shehron mein kiya jata hai jabkeh ye soobah balochistan ka darul hukumat bhi hai. Aaeye Quetta ke hawalay se chand aham haqaiq jaan laitay hain jo aap ki maloomat mein izafay ka baes banain ge.

  1. Quetta subah balochistan ka sub se bara shehar hai jo 2653 square km ke raqbe par pheela hua hai is shehar ki abadi taqreeban 10 lakh se zayada afrad par mushtamil hai.
  2. Quetta shehar ki tareekh 11th century se ja milti hai jub is par Mahmood Ghaznavi ne qabzah kiya tha.
  3. Quetta apne mayari khushk mewa jaat ke baes bain alaqwami satah par bhi maqbool hai.
  4. Quetta aur is ke ird gird ke ilaqon mein wasi paimanay par phalon ke baghaat paye jatay hain yehi wajah hai keh isay phalon ke baghaat ka shehar bhi kaha jata hai.
    Quetta Pakistan ke unchai par waqe shehron mein se hai.
  5. Is shehar mein hewanaat ki kafi iqsam payi jati hain jin mein markhor, cheetay, bheeriye, sunehri uqab aur gidh shamil hain.
  6. Pakistan ka mashoor pahari silsila koh e suleman quetta ke mashriqi hisay mein waqe hai.
  7. Quetta ka bolan medical collage 1972 mein qaim kiya gaya tha is medical collage ko balochistan mein aik khas maqam hasil hai.
  8. Quetta mein aik mashoor jheel bhi hai mujhe umeed hai keh aap ne quetta ki mashoor jheel ka naam suna ho ga main baat kar raha hon Hanna Jheel ki jo keh aik intihai khubsurat jheel hai jo keh quetta shehar ke mashriqi hisay mein 10 km ke faslay par mojood paharon ke darmiyan waqe hai.
  9. Quetta mein aik airport bhi mojood hai jo keh Pakistan ka dusra bara buland tareen airport hai.
  10. Quetta railway station Pakistan ke buland tareen railway stations mein se aik hai ye station satah samandar se 5499 foot ki bulandi par waqe hai.
  11. Balochistan university quetta mein june 1970 mein banai gayi thi aur ye 200 acre ke raqbay par pheeli hoi hai.
  12. Hayat Durani water sport academy balochistan ka wahid water sport training centre hai.
  13. Quetta ke qareeb aik national park bhi waqe hai jisay hazar ganji national park kaha jata hai. Hazar ganji ke mani hazar khazanay ke hain. Ye park quetta se 20 km janoob maghrib mein waqe hai aur 32500 acre ke raqbe par pheela hua hai.
  14. Pir Ghalib abshar sair o tafreh ke hawalay se aik khubsurat maqam hai aur quetta se 70 km ke faslay par waqe hai ye maqam tareekhi bolan wadi mein waqe hai.
    Quetta ke mashoor tareen chawk Manan aur shah jahan chawk hain.
  15. Quetta ke mashoor bazar liaquat bazar suraj bazar aur qandhari bazar hain.
  16. Quetta ajaib gharon ka ghar bhi hai jis yahan geological museum bhi hai.
  17. 31 december 1935 ko quetta mein aik bara zalzala aya tha jis ne puray shehar ko anan fanan mitti ke dher mein tabdeel kar diya aur aik andazay ke mutabiq 40000 afrad apni janon se hath dho baithay thay.
  18. Is qayamat khez zalzalay ne quetta ko bilkul tabah kar diya tha aur shehar ki koi imarat na bachi.
  19. Is zalzalay ka shumar janoobi asia ki tareekh ke 4 bare zalzalon mein kiya jata hai jis ke baghair quetta ki tareekh na mukamal hai.
  20. Is zalzalay ke baad quetta ki tameer e nau hoi magar tamam emaratain 1 manzila thien. Is ke ilawa bartanwi logon ne chunkeh apne fauji adey afghanistan ki sarhad ke sath bana liye thay is liye unhon ne quetta ki tameer e nau mein koi dilchaspi na li. Lekin quetta chunkeh afghanistan aur iran ke tijarati rastay par tha is liye ahista ahista is shehar ne apni hesiyat dobarah mustehkam kar li. Is ki tijarat afghanistan ke sath chaman ke rastay aur iran ke sath taftaan ke rastay dobarah shuru ho gayi.
zvr
Your Reaction

Leave a Comment