Advertise Here
Brands History Videos

Rooh Afza Benefits In Urdu Faide Rooh Afza History In Urdu Kahani

Rooh Afza Benefits In Urdu Rooh Afza Ki Dilchasp Kahani 100 Saal Purani

Aaj ka article pichlay tamam articles se mukhtalif hai kyun keh aaj ki tehreer aik mashoor mashroob ke bare mein hai main baat kar raha hon Rooh Afza sharbat ki tou aeye rooh afza ki kahani jaan laitay hain.

Rooh Afza Story In Urdu
Rooh Afza na sirf Pakistan balkeh bar e sagheer yahan tak keh khaleej mein bhi iftar ka aham tareen mashroob hai. Kuch log lemon nichor kar is ke zaiqe ko dobala karte hain tou chand ke khayal mein isay doodh mein milaya jaye tou maza ajata hai. Lekin ruh afza peenay wale bohat kam afrad ko maloom ho ga keh is mashroob ne bar e sagheer ki 100 sala tareekh dekhi hai. Ye aik rujhan saaz mashroob hai jis ki wajah se lal sharbat ki maqbuliat aaj bhi urooj par hai. Kya aap jantay hain keh ruh afza kyun banaya gaya tha? ye darasal garmi ke tor ke liye tayar ki gayi unani dawa hai.

Rooh Afza History In Urdu

Rooh Afza ki tareekh ki baat ki jaye tou 1908 mein purani dehli ke hakeem Hafiz Abdul Majeed ne ye unani sharbat tayat kiya jo shehar ke aam afrad ko garmi se bachnay mein madad deta hai. Unhon ne riwayati unani tib mein istemal hone wali jari butiyon aur arqiyat ka istemal kar ke aik aisa mashroob tayar kiya jo pani ki kami ko door karta hai. Is ki khubiyan naam se hi zahir hain, Rooh Afza yani ruh tak ko tazah kar dene wala mashroob.

1910 mein Noor Ahmad ne Rooh Afza ke liye rangeen label tayar kiye jinhain Bombai mein parsiyon ke mashoor chapa khanay bolton press se tayar karwaya gaya.
Lekin usay dawa ke bajaye aam mashroob ka darja milne mein kuch dahaiyan lagien. Ibtidai maqbuliat ka andaza ho jane ke baad Hakeem Abdul Majeed ne chand dahaiyon baad isay aik aam mashroob mein tabdeel kar diya. Hakeem sahib ke parpotay jin ka naam bhi Abdul Majeed hai, kehte hain keh jub unhon ne pehli baar Rooh Afza banaya tou us ki khushbu is tarah pheeli keh bahir log jama hona shuru ho gaye aur puchnay lage keh kya ho raha hai? sharbat ki ye pehli kheep tou aik ghantay mein hi khatam ho gayi thi.

Rooh Afza ko pyas bhujanay aur taza dam kar dene wale aam mashroob ke tor par market mein paish kiya gaya aur is ki khoob tasheer ki gayi. Phir turning point aya bar e sagheer taqseem ho gaya aur na sirf mulk 2 hison mein bata aur rooh afza bhi toot gaya. 1947 mein khandan ke baishtar arakeen Pakistan chale aye aur aik bhai ne Pakistan aur aik ne hindustan mein humdard dawakhana ka parcham buland kiye rakha. Hindustan mein tou hamdard dawa khanay ke qadam mazboot thay lekin Pakistan mein isay qadam jamanay mein sakht mehnat ka samna karna para yehi wajah hai keh karachi ke aram bagh mein 2 karaye ke kamron mein pehla dawa khana khula.

Pakistan mein hamdard laboratories ne 1953 mein apne qadam achi tarah jama liye aur aaj mulk ke aham tareen idaron mein se aik hai. Rooh Afza ka naam pandit shankar naseem ke majmue masnawi gulzar e naseem se liya gaya hai jis mein Rooh Afza aik kirdar ka naam tha. Pakistan bannay ke baad Rooh Afza ki sirf chand sau botalain farookht hoti thien jo barhtay barhtay aaj lakhon, carooron tak pohanch gayi hain.

Yaqeenan aap apne bachpan ke dinon se hi Rooh Afza ka istemal karte aye hon ge lekin aaj bohat sare degar sharbat bhi dastyab hain par aaj bhi Rooh Afza ki maqbuliyat mein koi kami waqe nahin hoi.

Kya aap jantay hain keh Pakistan aur India ke ilawa Rooh Afza Bangladesh mein bhi hai kyun keh Hakeem Muhammad Saeed ne humdard ki aik shakh mashriqi Pakistan mein bhi khooli thi lekin saqoot dhaka ke baad usay us ke mulazmeen ne hi chalaya aur sambhala.

Rooh Afza Benefits In Urdu Hindi

Rooh Afza ke faide beshumar hain khas tor par ye garmi ke mausam mein behtareen hai. Isay peenay se foran chusti aur tazgi aati hai. Is mein gulab aur cheeni bhi shamil hoti hai ruh afza thakawat aur dehydration ko door karne ke liye istemal kiya ja sakta hai. Rooh Afza peene se loh lagna, bukhar, jism ki garmi, bohat pyas lagna, garmi se thakan, zayada paseena ana jese masail se aram milta hai. Aksar log nahin jantay keh ye khoon ki kami ko door karne mein bhi aham hai aur is ke ilawa ye rooh afza ki taseer thandi hoti hai yani ye nervous system ke liye bhi acha hai. Rooh afza energy barhanay aur aap ki health improve karne mein bhi aap ki madad karta hai. Rooh Afza ke jese beshumar faide hain wese hi rooh afza ke nuqsanat bhi hain is bare mein bhi aik article alehda se paish kiya jaye ga. Par khayal rahe rooh afza ko thanday pani aur thandi cheezon mein mila kar hi peenay se is ke asal maza ata hai is ke liye aap doodh, dahi, sharbat lassi aur thanday pani ka istemal kar sakte hain.

Leave a Comment