Advertise Here
Brands History Life Stories Personalities Restaurants

Subway History In Urdu Subway Success Story In Hindi

Subway History In Urdu – Aaj ka article us insan ke bare mein hai jo kabhi university ki fees bhi ada nahin kar sakta tha magar us ki zindagi mein aik waqt aisa bhi aya jub us ka shumar dunya ke arab pati logon mein honay laga. Main baat kar raha hon dunya ke sub se bare fast food restaurant subway ki tou aeye dunya ke is mashoor tareen fast food restaurant ke malik Fred DeLuca ki kamyabi ki dastan jaan laite hain.

Subway Success Story In Hindi / Urdu

Fred DeLuca Pakistan ki azadi ke taqreeban 50 din baad 3 october 1947 ko Amreeci shehar new york ke ilaqe Brooklyn mein paida hua. 10 saal ki umer mein us ki mulaqat Peter Buck se hoi jo us ka behtareen dost bana.

Fred DeLuca jub university mein pohancha tou us ke mali halaat ache nahin thay yehi wajah hai keh kafi dinon se woh apni university ki fees ke bare mein bohat preshan tha. Ghar ke halaat kuch aise na thay keh woh apni bhari bharkam fees ka bojh apne waldain ke kaandhon par daal deta. Usay doctor bannay ka bohat shoq tha lekin fees ke paise na honay ke baes usay khatra mehsoos ho raha tha keh kahin us ka doctori ka khwab na toot jaye.

Woh aik din preshani ke alam mein university pohancha tou notice board par fees ke mutaliq aweezaan ilan parh kar shadeed preshan hua. Fees ada karne ka din qareeb aa chuka tha aur us ki jaib mein dheela tak nahin tha. Usay kuch samajh nahin araha tha keh kya kare. Us ka zameer bhi kisi ke agey hath pheelanay ki ijazat nahin deta tha. Ghar mein ghurbat ka deerah tha is liye usay apna taleemi kharcha pura karne ke liye aik store par kaam karna para. Wahan mehnat mazdoori se us ko jo paise miltay us se bamushkil hi us ka guzara ho raha tha.

University ki fees zayada thi jo us ki hesiyat se bahir thi. Woh part time job kar ke bhi usay pura nahin kar sakta tha lihaza apni preshani ko khatam karne ke liye woh apne bachpan ke dost ke paas chala gaya keh us se koi mashwara hasil kar sakay jo us ki preshani ko halka kar de. Jis din Fred DeLuca apne dost ke ghar pohancha us din garam lu chal rahi thi, chilchilati dhoop aur dopehar ka waqt tha aur Fred DeLuca ke chehre par preshani ke asaar numayan thay. Us ke dost Peter Buck ne usay dekha tou woh us ki preshani bhaanp gaya. Fred DeLuca ne apne dost ko sari surat haal bata di jis par Peter ne usay mashwara diya keh woh aik sandwich shop khool lay.

Peter ka jawab sun par Fred gehri soch mein parr gaya. Peter ne us ki himmat yun bandhai keh agar Fred ye karoobar shuru kare tou woh us ka partner ho ga. Fred ke liye ye faisla karna mushkil tha kyun keh us ke paas tou university ki fees dene ke liye kuch nahin tha tou kaise woh aik naya karoobar shuru kar sakta tha. Dusron ki naukri karte karte Fred thak chuka tha magar peter ke mashwaray se us ke dil mein apna karobar shuru karne ki khawahish angrai laine lagi. Fred ki is khawahish ko akhir peter hi ne pura kar diya. Us ne Fred ko business shuru karne ke liye 1000 dollar batoor e qarz diye jis par Fred ne us ka shukriya ada kiya.

Un donon ne mil kar 1965 mein aik subway sandwich shop khool li. Magar tab un ki wehm o gumaan mein bhi nahin ho ga keh aik din yehi sandwich shop unhain na sirf dunya ke ameer tareen logon mein shamil kar di gi balkeh dunya ki number 1 company bhi ban jaye gi.

Fred ko pehle saal jahan seekhnay ke liye bohat kuch mila wahan mushkil halaat ka bhi usay samna karna para. Is doran usay ehsas hua keh business ke pheelao ke liye advertising aur publicity ki ashad zaroorat hoti hai. Is ke ilawa usay ye bhi ehsas hua keh dukaan aisi jagah par ho jo door se nazar aye. Un ki sandwich shop ne pehle hi saal acha karobar kiya yehi wajah hai keh agley hi saal in donon doston ne dusri shop bhi khool li. Unhon ne shuru se hi apni product yani sandwich quality par koi samjhoota nahin kiya. Umdah mayar ki wajah se dinon mein un ke gahak barhnay lage.

Aur dekhtay hi dekhtay un ka sandwich puray shehar mein mashoor ho gaya. Is bare mein Fred DeLuca ne kaha keh is barhti hoi maqbooliyat aur har dil azizi ko deekh kar maine azam kiya keh ayenda 10 saalon mein 32 mazeed nayi shops khoolon ga. Is khwab ko pura karne ke liye maine ayri choti ka zoor lagaya yahan aik baat qabil e ghoor hai keh main aik hi shop ko bhi bara kar sakta tha lekin us mein gahkon ke liye masail thay. Woh hamare sandwich ko pasand karte thay aur is ke liye unhain safar ki saoobat bhi uthani parti thi. Agar aap business ko taraqi dena chahte hain tou is ke liye franchisain khoolain. Jub aap ki sakh ban chuki hoti hai tou customers apne qareebi restaurant se aap ki product khareedna pasand karte thay.

Kon janta tha keh Fred DeLuca doctor ban kar logon ka ilaj karne ke bajaye un ki ghiza ka saman kare ga. Aaj subway company dunya ke 106 mumalik mein 41827 restaurants ke sath mojood hai aur ye dunya mein fast food ki number 1 company hai. Lekin Fred Deluca ab is dunya mein nahin us ne 14 september 2015 ko amreeci riyasat florida mein apni zindagi ka akhri din guzara tha.

Leave a Comment