Advertise Here
Biography History Personalities

Tsutomu Yamaguchi History In Urdu 2 Baar Zinda Bachne Wala

Tsutomu Yamaguchi History In Urdu – Johri hathyar is dunya ki tabahi ka hathyar hai aur tarikh hamain batati hai keh is hathyar ne japan ke shehron ko tabah o barbad kar ke rakh diya tha aur lakhon log halak ho gaye thay magar ye taqreeban na mumkin hai keh koi atomi hathyar ke hamlay mein zinda bach jaye aur agar koi bach bhi jaye tou ye bohat herat ki baat ho gi. Lekin agar hum tareekh ke safhon par nazar dalain tou tareekh hamain batati hai keh aisa herat angez waqai ho chuka hai keh Japan ka aik shehri amreeca ke atom bomb ke hamlay mein zinda bach gaya tha magar is se bhi zayada herat ki baat tou ye hai keh ye woh insan hai jo 1 nahin 2 atomi hamlon mein zinda bach gaya tha. Aaj tak jang mein 2 baar hi atomi hathyaron ka istemal hua jinhain amreeca ne japan ke 2 shehron par giraya tha aur japan ka ye shehri unhi 2 hamlon mein inhi 2 shehron mein mojood tha jahan atomi hamlay hue par ye japan ka shehri hai kon jo 2 atomi hamlon mein zinda bach gaya aeye jantay hain.

Tsutomu Yamaguchi 16 march 1916 ko Japan ke shehar Nagasaki mein paida hue. Japan ki hukumat ne is baat ki tasdeek ki hai keh us ka aik shehra jis ka naam Tsutomu Yamaguchi hai Hiroshima aur Nagasaki ke atomi hamlon mein zinda bachne wala wahid shakhs hai.

Yamaguchi ne 1930 mein Mitsubishi Heavy Industries mein kaam karna shuru kiya. Yamaguchi 6 august sun 1945 ko karobar ke silsilay mein Hiroshima gaye hue thay jub aik amreeci fauji tayare ne shehar par pehla atom bomb giraya tha. Is hamlay mein woh jhulas gaye aur inhain aik raat wahin guzarni parri. Baad mein woh apne shehar Nagasaki pohanche keh 9 august ko amreeca ne wahan bhi atom bomb gira diya magar ye us hamlay mein bhi zinda bach gaye.

Ye baat tou pehle se maloom thi keh Yamaguchi Nagasaki ke atomi hamlay se bach janay walon mein shamil thay lekin Japan ki hukumat ne is baat ko bhi tasleem kar liya keh woh hamlay ke waqt Hiroshima mein bhi mojood thay. Atomi hamlay mein bach janay ka certificate hasil karne ke baad Japani shehri hukumat ki taraf se zar e talafi ke mustahiq ho jatay hain jis mein medical check up bhi shamil hai.

Nagasaki ki shehri hukumat ke aik ahalkar ke mutabiq 2 atomi hamlon ka nishana honay ka matlab ye bilkul nahin hai keh un ka zar e talafi barh jaye ga. Mister Yamaguchi ne media ko bataya tha keh un ka 2 dafa tabkari ka nishana banna ab sarkari record ka hisa hai. Un ka kehna hai keh ye baat anay wali naslon ko mere marnay ke baad bhi atomi hamlay se tabah kari ki khaufnak kahani sunaye gi.

Hiroshima mein atomi hamlay se 1 lack 40000 afrad halak hue thay jabkeh Nagasaki mein halak honay walon ki bhi bari tadad thi. Atomi hamlay mein bach janay wale kayi Japani shehri baad mein cancer samait tabkari ke natijay mein paida hone wali bemariyon mein mubtala ho gaye thay.

Yamaguchi Jo keh amreeca ke 2 atomi hamlon mein zinda bachay wale wahid insan ka aizaz rakhte hain ab is dunya mein nahin hain woh Stomach cancer ke baes 4 january 2010 ko 93 saal ki umar mein is dunya se rukhsat hue.

17 december 2010 ko BBC ke aik mazahiya program mein Yamaguchi ko dunya ka sub se bad qismat tareen insan kaha gaya tha aur Yamaguchi ka mazaq uratay hue ghalat alfaz ka istemal kiya gaya us episode ki video ko baad mein BBC ne ghalti mantay hue delete kar diya tha. Japan mein us episode par bohat tanqeed ki gayi thi aur Yamaguchi ki beti ne bhi apni narazgi ka izhar kiya tha.

zvr
Your Reaction

Leave a Comment